السبت، 11 أغسطس 2012

شكر وتقدير لكل من دعا لي اليوم

شكر وتقدير لكل من دعا لي اليوم

 اتقدم بجزيل الشكر والتقدير لكل من دعا لي بعد تغريدتي صباح اليوم السبت 11/08/2010 واشكرهم جميعا وخاصه من كلفوا انفسهم بمحادثتي تليفونيا .

 ذهبت للمشفي وقابلت طبيبي المعالج وهو صديق قديم اعرفه من زمن ففوجئت به محضر لي كونسلتو متنوع وكاني هعمل عمليه كبري وفي الاول اتخضيت ولكنه طمني وقال عشان تعرف معزتك عندي .. وجبتك المشفي بتاعتي عشان نطمن عليك دااحنا عشره عمر ..

 ربنا يكرمك يادكتور علي وتفرح باحفادك يارب . المهم عملت تحاليل واشعات وموجات صوتيه ..

 واجمع الكل علي عدم صيامي ولازم اشرب 7 لتر مياه يوميا منهم 2 لتر عصير قصب عشان البولينا والكرياتين وستبقي القسطره الي ان تنخفض نسبهم بالدم ويقل حجم البروستاتا ويجب ان الاانفعل يعني ابقي بارد وده مش ممكن ابدا لاني اصلا ايجابي مش سلبي .

 وقال ايه اغير جو وابعد عن الاحداث فقلت لهم ازاي يعني ابعد عن الاحداث وكل حته في مصر بها احداث اسوأ اروح يعني هولندا ولا ايه ؟

 فرد طبيب الموجات الصوتيه وقال لا روح غزه دي بقت احسن من مصر وانظف والكهربا والميه متوفرين .. انا لسه جاي من هناك اول امبارح لاني كنت من ضمن بعثه الوزاره للكشف علي اهلنا وعشيرتنا هناك وضحك وقال لي كده ارخص من هولندا ع الاقل ممكن تيجي زياره لمصر بدون تكاليف باهظه...

ياحلاوه غزه اصبحت احسن من مصر واحنا خلاص بقينا قطاع مصر التابع لغزه .. 

اه يابلد عايزه راجل بيحبك مش عميل ولا تبع حد بس فين ياخساره الرجاله انتهت واصبحت البلد انصاص رجال ..

الذ حاجه اني الراجل ابو خرطوم

وانا خارج من المشفي فوجئت بطفله اموره بتقول لامها ماما شوفي الراجل ابو خرطوم ؟ردت امها : اخرسي ياكلبه..فقعدت لها وجيت ابوسها فخافت مني وقلت لها : يا حبيبتي انا عيان والخرطوم ده عشان انا مش بعرف اعمل بيبي ..قالت يعني ايه ظقلت لها عشان عيان ياحبيبتي .. ووريتها كيس تجميع البول وضحكت وقالت يعني انت ماعندكش كتكت ظفطست علي روحي من الضحك واتاري امها عماله تصورنا فيديو ولما ضحكت جيت ابوسها حضنتني وقالت ك انا اسفه ياعمو ماتزعلش ..ياحلاوتك يامصر بناسك الحلوين



العبد الفقير لله يتامل وقرفان من الزباله اللي علي كورنيش اسكندريه اللي بعشقها بس في الشتا وبقت حاجه ثانيه